Ish-drejtoresha e Agjencionit nacional për mobilitet dhe program evropian arsimor, Lidija Dimova nuk pranoi fajin për veprat keqpërdorim të detyrës zyrtare dhe autorizimit dhe mashtrim në dëm të bashkësisë evropiane.
I akuzuari i dytë, Aleksandar Goçev e pranoi fajësinë për veprën mashtrim të BE-së dhe për këtë arsye procedura e tij do të vijojë veçmas.
Dëshmi do të paraqiten edhe në seancat e radhës, por sipas avokatit mbrojtës, Mollçanov do të dëshmohet se procedura hetimore ka qenë jo e plotë.
“Nuk është përcaktuar se në kundërshtim me cilën dispozitë ligjore të ligjit për furnizime publike është vepruar. Përkundër kësaj ne sqaruam se procedura e tërësishme është respektuar në pajtueshmëri me ligjin për furnizime publike duke cituar nenet në fjalë. Deri më tani nuk është paraqitur asnjë i dëmtuar nga këto procedura.”, – deklaroi avokati, Zoran Mollçanov.
Prokurorja Suzana Mirçevska Kuzmanovska, parashtroi akt akuzues ndaj Dimovës e cila akuzohet për keqpërdorim të detyrës duke angazhuar bashkëpunëtor pa shpallje të konkursit. Po ashtu akuzohet edhe për pagesën e mëditjeve për udhëtime zyrtare dhe për lidhjen e marrëveshjeve pa pasur furnizime publike.
Gjykimi për Dimovën do të vazhdojë më 3 mars.
