Rritja e pagave në sektorin publik duhet të zbatohet nga viti 2024, tha ministri i financave, Fatmir Besimi. Sipas tij, pagat në sektorin publik duhet të rriten nëse rritet produktiviteti dhe rriten pagat në sektorin real, sepse tani mund të ketë implikime në inflacion.
“Harmonizimi i pagave nga Këshilli ekonomiko-social do të zgjasë më shumë dhe metodologjia për rritjen e pagave mund të miratohet më shpejtë.”, – deklaroi ministri i financave, Fatmir Besimi.
Ministri i financave, Fatmir Besimi, konfirmoi se për muajin prill të vitit 2023 ka marrë pagë më të lartë për 78 për qind, konformë vendimit të Gjykatës Kushtetuese. Siç informoi në takimin me gazetarë, paga e tij e mëparshme ka qenë 71.145 denarë, ndërsa për muajin prill është paguar 125.960 denarë. Besimi theksoi se për 78 për qind u është rritur paga 1.060 funksionarëve dhe se për këtë rritje, deri në fund të vitit, nga buxheti do të ndahen 960 milionë denarë shtesë.
“Është mirë që Gjykata Kushtetuese e shfuqizoi nenin e kontestuar të vitit 2012 për koeficientët e pagave, në vend që ta anulonte. Nëse do ta anulonte, zyrtarët do të duhej të paguanin një borxh të mbetur për gati 11 vjet me kamatë.”, – theksoi ministri i financave, Fatmir Besimi.
Rritja e pagave të zyrtarëve vjen pas vendimit të marsit të Gjykatës Kushtetuese për shfuqizimin e një neni të Ligjit për paga dhe kompensime të tjera të të zgjedhurve dhe të emëruarve, me të cilin ata ishin ngrirë në dhjetë vitet e fundit. Përveç zyrtarëve qeveritar, ai përfshin edhe deputetë, kryetarë komunash, gjyqtarë dhe persona të tjerë të zgjedhur.
