Ministria e Mjedisit Jetësor dhe Planifikimit Hapësinor informon opinionin publik se sot ka shpërthyer një zjarr në një objekt për riciklim të baterive dhe mbeturinave elektronike.
Bëhet fjalë për një objekt që posedon leje të vlefshme për menaxhim me mbeturina, të lëshuar nga Ministria.Shërbimet kompetente kanë ndërhyrë menjëherë dhe po punojnë në lokalizimin dhe shuarjen e plotë të zjarrit.
Për të siguruar informacione të sakta dhe transparente lidhur me ndikimin e mundshëm në mjedisin jetësor dhe shëndetin e qytetarëve, Ministria ka angazhuar laboratorë të akredituar për matjen e cilësisë së ajrit ambienal në zonën e prekur.
Rezultatet nga këto matje do të publikohen menjëherë pas përpunimit të tyre, ndërsa rezultatet e para priten tashmë sonte! Ministria do të vazhdojë të informojë rregullisht dhe me kohë opinionin publik për të gjitha aktivitetet dhe gjetjet e mëtejshme në lidhje me ngjarjen.
Në pritje të rezultateve të matjeve, Ministria rekomandon që qytetarët në zonën e prekur të ndërmarrin masat e mëposhtme mbrojtëse:
1. Qëndroni në shtëpi – Shmangni qëndrimin në ambiente të hapura, veçanërisht afër vendit të zjarrit.
2. Mbyllni dritaret dhe dyert – Për të zvogëluar ndësinë e futjes së ajrit të ndotur në hapësirat e brendshme.
3. Fikni ventilimin nga jashtë – Shmangni përdorimin e kondicionerëve dhe sistemeve pa filtra që tërheqin ajër nga jashtë.
4. Mbroni grupet e ndjeshme – Fëmijët, të moshuarit dhe personat me sëmundje kronike të qëndrojnë në ambiente të mbyllura.
5. Përdorni maska mbrojtëse – Nëse duhet të dilni jashtë, përdorni maska të tipit FFP2 ose FFP3.
6. Kujdes me ushqimin dhe ujin – Lani mirë frutat dhe perimet nga kopshtet përreth. Përdorni vetëm ujë nga burime të sigurta.
7. Ndiqni informacionet zyrtare – Informohuni rregullisht përmes kanaleve zyrtare të Ministrisë.
Ministria apelon për qetësi dhe sjellje të arsyeshme dhe siguron se të gjitha institucionet kompetente janë të mobilizuara për të ndjekur dhe menaxhuar situatën.
