Ka dalë raporti zyrtar nga zjarri i madh që shpërtheu në deponinë Drislla këtë pasdite. Sipas drejtorit të Qendrës për Menaxhim me Kriza, Muhamed Ali, zjarri ka shpërthyer në pjesën qendrore të deponisë dhe se për momentin janë duke intervenuar zjarrfikësit, njofton TV21.
“Njësia e zjarrfikësve intervenon me 2 automjete dhe 5 zjarrfikës. Për përforcim u dërgua edhe një aeroplan “Air Tractor” nga DMSH me qëllim të ndihmojë në shuarjen e zjarrit dhe të parandalojë përhapjen e mundshme drejt pyllit me pisha dhe vendbanimit”, tha Ali.
Ai tha se është intervenuar edhe me “Air tractor”, por intervenimi është ndërprerë për shkak se mund të shkaktoheshin vatra të reja.
“Piloti i “Air Tractor”-it theksoi se zjarri është në pjesën qendrore të deponisë dhe se çdo hedhje uji nga lartësi mund ta fuqizojë zjarrin dhe të shkaktojë ndezje të vatrave tjera. Piloti nuk konstatoi rrezik për përhapje drejt pyllit me pisha dhe u udhëzua të veprojë në zjarret në Malin e Zi të Shkupit”, sqaroi Ali./TV21
