Një zjarr i madh përfshiu vonë mbrëmë lagjen Lisiçe të Shkupit, duke shkrumbuar plotësisht dy shtëpi dhe duke dëmtuar pjesërisht një tjetër.
Sipas informacioneve të para jozyrtare, flakët shpërthyen në rrugën Gjorgje Andrejeviq, në një nga barakat, dhe më pas u përhapën me shpejtësi në objektet përreth.
Dëshmitarët për mediat deklaruan se shuarja e zjarrit ishte veçanërisht e vështirë për shkak të pllakave të azbestit që ishin pjesë e konstruksionit të çative, duke krijuar rrezik edhe për vetë zjarrfikësit.
Jozyrtarisht, zjarri ka nisur nga një bisht cigareje i hedhur, ndërsa përhapja e tij e shpejtë shkaktoi dëm të madh material dhe panik mes banorëve.
Një person, në shtëpinë e të cilit dyshohet se ka nisur zjarri, ka pësuar lëndime më të rënda dhe është dërguar në spital.
Më shumë detaje rreth shkaqeve dhe pasojave të zjarrit priten gjatë ditës nga autoritetet përkatëse.
