Presidenti ukrainas, Volodymyr Zelenskyy, në një takim me presidenten e Komisionit Evropian, Ursula von der Leyen, theksoi se është thelbësore që Evropa të jetë po aq e bashkuar tani, sa ishte në fillim të luftës në vitin 2022 pasi kjo do të ndihmonte në arritjen e një “paqes së vërtetë”.
“Putini ka shumë kërkesa, por ne nuk i dimë të gjitha,” u shpreh Zelensky.
Ai shtoi se do të duhet kohë për t’i shqyrtuar këto kërkesa, por theksoi se është “e pamundur ta bësh këtë nën atë presion të armëve”.
Zelensky po ashtu deklaroi se vijat aktuale të frontit në luftën mes Ukrainës dhe Rusisë duhet të jenë baza për çdo bisedim të mundshëm për paqe.
“Ne kemi nevojë për negociata të vërteta, që do të thotë se mund të fillojmë aty ku është vija e frontit tani,” theksoi ai.
Presidenti ukrainas tha gjithashtu se një samit trepalësh mes Ukrainës, Rusisë dhe SHBA-së është i domosdoshëm, por se Rusia nuk jep asnjë shenjë që një takim i tillë do të ndodhë.
