Autostrada Kërçovë–Ohër, një ndër projektet më të rëndësishme infrastrukturore në vend, po i afrohet çdo ditë e më shumë përfundimit. Pas viteve të ngecjeve, tashmë punimet kanë hyrë në fazën përmbyllëse, duke i hapur rrugë zhvillimit ekonomik dhe perspektivave të reja për qytetarët e rajonit.
Sot u lëshua në përdorim segmenti nga fshati Klimishtë deri në qytetin e Ohrit, me një gjatësi prej 17 kilometrash. Ky është një hap i madh përpara drejt finalizimit të autostradës, e cila pritet të sjellë lehtësira të mëdha në komunikacion, turizëm dhe bashkëpunim ekonomik.
Me këtë rast, Zëvendësministrja e Transportit, Katrina Zekolli Shaqiri, theksoi rëndësinë strategjike të këtij projekti:
“Autostrada Kërçovë–Ohër nuk është vetëm një rrugë, por një arterie e re zhvillimi që do të lidhë më mirë qytetarët, do të përmirësojë sigurinë rrugore dhe do të nxisë rritjen ekonomike dhe turistike të rajonit. Me lëshimin në përdorim të këtij segmenti, jemi edhe një hap më afër përmbushjes së një premtimi të madh për qytetarët.”
Projekti i autostradës, që ka një rëndësi të veçantë për Maqedoninë e Veriut, pritet të përfundojë në tërësi së shpejti, duke ofruar standarde moderne të infrastrukturës dhe duke lehtësuar ndjeshëm qarkullimin në drejtim të Ohrit, një prej destinacioneve më të vizituara turistike në vend.
