Ish-futbollisti zviceran, Marco Streller beson se mesfushori shqiptar, Granit Xhaka, mund t’i bashkohet Real Madridit.
Streller theksoi se nuk do të ishte çudi nëse karriera e Xhakës do të vazhdonte te Real Madrid, pas lojës së tij në nivelet e larta tash e shumë vite.
“Unë mund ta imagjinoj lehtësisht se nëse Xabi Alonso shkon në Real Madrid dhe Luka Modric largohet, kjo mund të ndodhë”, ka thënë fillimisht Streller në një intervistë për mediumin zviceran bluewin.
Ish-sulmuesi i Zvicrës, Baselit, Kolnit, Shtutgartit dhe Thun u pyet sërish nëse Xhaka mund të bashkohet me Real Madridin dhe ai pohoi një gjë të tillë.
“Patjetër që mund të ndodhë. Alonso e di se Graniti ishte vendimtar për suksesin e Leverkusenit”, përfundoi ish-sulmuesi zviceran.
Që nga kalimi nga Arsenali te Bayer Leverkusen, Xhaka ka qenë një figurë kyçe në mesfushën e skuadrës së Xabi Alonso.
Ai udhëhoqi skuadrën për të fituar titullin e ligës gjermane dhe kupën, ndonëse humbi nga Atalanta në finalen e Ligës së Evropës.
