Presidenti i Serbisë, Aleksandar Vuçiq, ka folur për situatën ekonomike pas sanksioneve amerikane ndaj Industrisë së Naftës së Serbisë (NIS). Ai përsëriti thirrjen drejtuar qytetarëve që të mos bien në panik, por paralajmëroi se situata gjeopolitike po bëhet gjithnjë e më e vështirë.
“Ne po sillemi me përgjegjësi dhe seriozitet. Kemi naftë dizel që po shfrytëzohet sot. Problemi ynë lind kur ndalet puna në rafinerinë e Pançevës. Ne i kemi bërë apel palës ruse, i kemi lutur amerikanët, dhe ia kemi dalë për tetë muaj”, ka thënë Vuçiq për “Informer”.
Vuçiqi u shpreh se Rusia i ka ofruar Serbisë një kontratë për furnizimin me gaz vetëm deri në fund të vitit, çka e quajti lajm zhgënjyes, pasi Beogradi kishte pritur nënshkrimin e një marrëveshjeje afatgjatë.
“Ka një lajm tjetër që vjen nga Moska, apo Shën Petersburgu, si të doni ta quani, se na kanë ofruar kontratë për gaz deri në Vitin e Ri. I thashë se ky është një lajm shumë zhgënjyes për ne, sepse ishte planifikuar që deri në maj të nënshkruhej një kontratë trevjeçare”, theksoi Vuçiq.
Vuçiqi theksoi se nëse rafineria ndalon punën, nevojiten nga dy deri në katër javë për ta vënë sërish në funksionim, ndërsa në rast se ndalet pompimi i naftës vendore, duhen muaj për t’u rikthyer në normalitet.
“Kemi një sërë problemesh. Dje kam folur me drejtorin e Srbijagas, Bajatoviq. Nuk kemi një rafineri tjetër. Duhet ta ndërtojmë sa më shpejt dhe t’u kërkojmë ndihmë kinezëve”, ka theksuar ai.
