Pas të shtënave me pasoja fatale në Bit Pazar, opozita LSDM ka reaguar ashpër duke e cilësuar ngjarjen si një tjetër dëshmi të dështimit të institucioneve dhe përkeqësimit të sigurisë publike nën drejtimin e Ministrit të Brendshëm, Pançe Toshkovski.
“Krismat e fundit kriminale në Bit Pazar janë një provë e mëtejshme e shkeljes së rëndë të sigurisë publike dhe mosfunksionimit të institucioneve,” thuhet në deklaratën e LSDM-së.
Sipas partisë opozitare, qytetarët e Shkupit dhe të gjithë Maqedonisë po ndihen gjithnjë e më të pasigurt, ndërsa krimi dhe dhuna po përhapen në çdo hap.
“Përballë mungesës së masave parandaluese dhe reagimeve efektive, jemi dëshmitarë të një kaosi institucional që rrezikon jetën e qytetarëve,” thuhet më tej në reagim.
LSDM kërkon që Toshkovski të mbajë menjëherë përgjegjësi për situatën e krijuar dhe i bën thirrje autoriteteve për një hetim të shpejtë dhe transparent për zbardhjen e ngjarjes.
“Sa njerëz të tjerë duhet të humbin jetën që Toshkovski të japë llogari?” – theksohet në deklaratë.
Partia thekson nevojën për reforma të menjëhershme në sistemin e sigurisë dhe zbatimin e masave të shtuara në zonat e ndjeshme, duke theksuar se qytetarët meritojnë të jetojnë në paqe dhe siguri.
