Partia në pushtet, VMRO-DPMNE, ka kritikuar ashpër qeverisjen shtatëvjeçare të koalicionit LSDM–BDI, duke e cilësuar atë si një periudhë që ka lënë pasoja të rënda dhe të përhershme në funksionimin e institucioneve shtetërore, veçanërisht në sistemin e drejtësisë.
Sipas qëndrimit të shprehur nga VMRO-DPMNE, gjatë kësaj periudhe është instaluar një sistem i ri i krimit dhe korrupsionit që ka depërtuar në të gjitha aspektet e jetës shoqërore. Ata theksojnë se një nga sektorët më të dëmtuar është ai i gjyqësorit, ku për vite me radhë, sipas tyre, përzgjedhja e gjyqtarëve dhe prokurorëve është bërë në mënyrë të njëanshme dhe të politizuar, nën ndikimin e ish-kryeministrit Zoran Zaev.
“Si në një ‘casting’, gjyqtarët dhe prokurorët janë përzgjedhur në Strumicë, nën drejtimin e drejtpërdrejtë të Zoran Zaevit”, thuhet në deklaratën e VMRO-DPMNE-së. “Tani, këta persona të emëruar gjatë qeverisjes së Zaevit janë ata që shpërndajnë ose shesin drejtësinë”.
Partia gjithashtu vë në dukje një rast konkret që sipas tyre dëshmon për kapjen e sistemit gjyqësor: vendimi i një gjyqtari për të dënuar me vetëm dy vite burg një shofer që shkaktoi vdekjen e një vajze të re në një kalim për këmbësorë. “Këshilli Gjyqësor e arsyetoi këtë vendim, duke treguar edhe një herë se sistemi është i kontrolluar nga njerëzit e Zaevit”, thekson VMRO-DPMNE.
Në deklaratën e tyre, ata shtojnë se ky sistem “i lulëzuar” sipas shembullit të ish-qeverisjes, ka shkaktuar humbje të thellë të besimit të qytetarëve në drejtësi. “Në një vend ku për një jetë të humbur jepen dy vite burg dhe për disa qebapë të vjedhur pesë vite, drejtësia është e shkatërruar”, thuhet më tej.
Sipas VMRO-DPMNE-së, mosbesimi ndaj anëtarëve të Këshillit Gjyqësor i votuar nga Kuvendi është pasojë e këtyre vendimeve të kontestuara. Megjithatë, ata theksojnë se anëtarët e këshillit nuk kanë dhënë dorëheqje, por vazhdojnë të justifikojnë padrejtësitë dhe të dëmtojnë funksionimin e shtetit të së drejtës.
