Pas vendimit të presidentit të Shteteve të Bashkuara të Amerikës, Donald Trump, i cili vendosi tarifa doganore për Maqedoninë e Veriut për 33 për qind, kanë reagur sot edhe nga koalicioni VLEN, të cilët për këtë fajin e hedhin tek BDI. Sipas tyre, vendi u përballë me tarifa të larta nga SHBA-ja si pasojë e personave nongrata, duke aluduar në disa zyrtarë të BDI-së. Nga VLEN theksojnë se arsyeja kryesore pse Maqedonia e Veriut po përballet me tarifa më të larta nga SHBA-të nuk ka të bëjë vetëm me faktorë ekonomikë, por mbi të gjitha me prishjen e imazhit të shtetit në arenën ndërkombëtare.
“Kjo prishje e imazhit është rezultat i drejtpërdrejtë i keqqeverisjes dhe skandaleve të ish pushtetit, duke përfshirë edhe funksionarët e BDI-së, të cilët sot ndodhen në listën e zezë amerikane, që nuk janë të vetëm bashkë me ta janë edhe keqpërdërues nga kampi maqedonas. Këta faqezinjë që sot janë bashkë në listën e zezë amerikane i ka bashkuar korrupsioni në bashkëpunimin për shkatërrimin e vendit”.
Koalicioni VLEN vlerson se Maqedonia e Veriut ka nevojë për politika të reja, për një qasje serioze ndaj ekonomisë dhe për të rindërtuar marrëdhëniet me partnerët ndërkombëtarë – jo për siç thonë, hipokrizi nga ata që e kanë shkatërruar këtë vend.
Ndërkaq, në lidhje me vendosjen e tarifës për Maqedoninë e Veriut, gjatë ditës së djeshme reaguan edhe nga qeveria, të cilët deklaruan se tarifat e Trumpit nuk do të kenë ndikim në ekonomi dhe se ata theksuan se ekipet qeveritare kanë kohë që po analizojnë pasojat e mundshme dhe së bashku kanë përgatitur një plan për tejkalimin e situatës.
Kujtojmë se tarifat e SHBA-së nga rajoni, Serbia është prekur me shkallën më të lartë prej 37.2%, e ndjekur nga Bosnjë- Hercegovina me 35%, RMV 33 %, ndërsa Kosova dhe Shqipëria me nga 10%
