Kandidati i pavarur për kryetar të Komunës së Gostivarit, Visar Ademi, përmes një letre të hapur ka ftuar rivalët e tij Valbon Limani dhe Sebadin Dauti në një kafe të përbashkët të dielën në orën 10:00, në Kafe “Minjon” pranë lumit. Ftesa ka për qëllim krijimin e një atmosfere miqësore dhe dhënien e shembullit të një gare të ndershme zgjedhore.
Në vazhdim mund të lexoni letrën
Letër e hapur
Drejtuar kandidatëve për Kryetar të Komunës së Gostivarit, z. Valbon Limani dhe z. Sebadin Dauti
Të nderuar z. Limani dhe z. Dauti,
Së pari, më lejoni t’ju uroj sinqerisht për kandidaturat tuaja dhe t’ju shpreh dëshirën që kjo fushatë të zhvillohet me dinjitet, ashtu siç e meritojnë qytetarët e Gostivarit. Zgjedhjet janë një mundësi e artë për të treguar kulturë politike, respekt reciprok dhe gatishmëri për t’u përballur me sfidat e përbashkëta të qytetit tonë.
Përpara se të shkojmë drejt një debati publik, dëshiroj t’ju ftoj të dyve në një kafe të përbashkët nesër, të Diellën, në orën 10:00, në Kafe “Minjon” skaj lumit. Kjo do të ishte një mundësi e mirë që të ulemi në një atmosferë miqësore, të shkëmbejmë mendime dhe të japim një shembull qytetarie përpara se gara të hyjë në fazat e saj më energjike
Jam i bindur se qytetarët presin nga ne shembullin më të mirë të garës së ndershme dhe të argumentuar. Le të ngrisim nivelin e kësaj fushate në atë në standardin e kulturës demokratike që e qytetarët e Gostivarit padyshim e meritojnë.
Me respekt,
Visar Ademi
Kandidat i pavarur për Kryetar të Komunës së Gostivari
