Komisionerët në Kosovë po vijojnë numërimin e votave për deputet të parlamentit të ri.
Procesi që nisi dje vazhdoi gjatë gjithë natës shoqëruar me disa incidente të vogla dhe ndërprerje të shkurtra në disa qendra numërimi.
Sipas rezultateve paraprake ndarja e mandateve do të jetë kështu:
LVV – 47 deputetë
PDK – 25 deputetë
LDK – 20 deputetë
AAK – 8 deputetë
Mbetet e paqartë si do të formohet qeveria e re dhe kush do të drejtojë vendin për katër vitet e ardhshme, pasi asnjëra nga partitë nuk ka mundur të fitojë shumicën.
Lëvizjes Vetëvendosje do t’i duhen të paktën 13 deputetë, ndërsa pritet edhe numërimi i votave të diasporës dhe atyre me kusht.
Nga ana tjetër, tre partitë më të mëdha opozitare, PDK, LDK dhe Aleanca për Ardhmërinë e Kosovës dhe Nisma do duhet të bëhen të gjitha bashkë, megjithatë edhe kjo duket e vështirë për shkak të parakushteve që secila ka vendosur.
Përfaqësues politikë të komuniteteve pakicë joserbe të cilët rezervojnë 10 mandate, kanë thënë se do të mbështesnin, parimisht cilindo mandatar për formimin e qeverisë së re, pavarësisht nëse do të vinte nga partia aktuale në pushtet apo opozita.
Bashkimi Europian ka thënë se mezi pret formimin e qeverisë së re të Prishtinës.
Në një komunikatë të përbashkët shefja e politikës së jashtme Kaja Kallas, dhe komisionarja për Zgjerim thanë se do të vazhdojnë angazhimin me autoritetet dhe mbështetjen e Kosovës.
