Prokuroria Publike Themelore në Shkup ka dhënë urdhër për realizim të procedurës hetuese kundër një personi për të cilin ekziston dyshimi i bazuar se ka kryer veprën penale – vrasje.
Hetimi do të zhvillohet edhe kundër një personi për veprën penale – ndihmë ndaj kryerësit të veprës penale.
“I dyshuari i parë, dje gjatë kryerjes së dhunës në familje në shtëpinë në Shuto Orizarë e ka privuar nga jeta partneren e tij me të cilën ka jetuar në shoqëri jashtëmartesore. Veprën e ka kryer në prani të bijës 5-vjeçare. Viktimës i ka shkaktuar lëndime dhe plagë të rënda me thikë në pjesën e qafës dhe gjoksit, prej të cilave ajo ka ndërruar jetë në vendin e ngjarjes”, qëndron në njoftimin e PPTh-së.
Bëhet e ditur se i dyshuari për vrasje ka ikur më pas nga shtëpia dhe duke i ndihmuar i dyshuari i dytë, ai ka ndërruar veshmbathjet dhe është larguar në drejtim të kufirit në Tabanoc, për t’u arratisur, por është kapur nga Policia e Maqedonisë së Veriut.
Nga Prokuroria njoftojnë se tashmë është gjetur edhe arma me të cilën është kryer vrasja, veshmbathja e kryerësit dhe dëshmi të tjera materiale.
Prokuroria ka kërkuar që ndaj vrasësit dhe ndihmësit të tij të parashtrohet masë e paraburgimit.
