Inspektorati Shtetëror Sanitar dhe Shëndetësor (ISHSSH) kërkon mbikëqyrje nga ekspertët për mënyrën e trajtimit të foshnjës shtatë muajshe, e cila katër ditë më parë vdiq në Klinikën për sëmundje të fëmijëve. Një komision pranë Ministrisë së Shëndetësisë do të duhet të vendosë nëse ka pasur gabim mjekësor në këtë rast. Inspektorët qëndruan në terren për dy ditë dhe u konstatua se pavarësisht udhëzimeve të tyre, në Klinikë janë ende në shërbim vetëm praktikantët.
“Është konstatuar nevoja që Ministri i Shëndetësisë, në pajtim me nenin 6 paragrafi 2 të Ligjit për Inspektim Sanitar dhe Shëndetësor si dhe nenin 296 të Ligjit për Kujdes Shëndetësor, të inicojë procedurë për mbikëqyrje profesionale mbi trajtimin e foshnjes shtatë muajshe. Gjithashtu është konstatuar se klinika ende nuk e ka zgjidhur problemin me praninë e detyrueshme të specialistit në ambulancën për kujdestari, për çka zhvillohet procedurë kundërvajtëse në ISHSSH”, thonë nga Inspektorati Shtetëror Sanitar dhe Shëndetësor.
Lidhur me gjendjen reale dhe trajtimin e foshnjës, u konstatua se fëmija është sjellë fillimisht në klinikën e sëmundjeve të fëmijëve më 9 dhjetor për shkak të temperaturës së lartë dhe skuqjes në të gjithë trupin që para një jave. Pas një ekzaminimi nga specializantë dhe në konsultim me një specialist, foshnja është dërguar për ekzaminime shtesë. Pas rezultateve të marra, foshnja është dërguar për mjekim në shtëpi, por më 11 dhjetor gjendja e saj është përkeqësuar sërish.
“Më 11 dhjetor, në orët e mbrëmjes, fëmija është sjellë sërish në klinikë dhe për shkak të gjendjes së përkeqësuar klinike është shtruar në Repartin e Neurologjisë. Është udhëzuar për më shumë ekzaminime dhe më 13 dhjetor për shkak të përkeqësimit të mëtejshëm të gjendjes shëndetësore është transferuar në Repartin e Mjekimit Intensiv dhe Terapi. Pas stabilizimit të gjendjes, është kthyer përsëri në Repartin e Neurologjisë, ku ka qëndruar për disa orë, më pas është rikthyer në RMIT, ku janë kryer analiza shtesë radiologjike, ekografike dhe analiza të tjera laboratorike, të cilat tregojnë për gjendje të rëndë të përgjithshme të foshnjes, e cila në orët e mbrëmjes së 15 dhjetorit përfundon me eksitus”, njoftojnë nga Inspektorati Shtetëror Sanitar dhe Shëndetësor.
Foshnja e vdekur shtatë muajshe ka shtuar shqetësimin e publikut, pasi në një periudhë shumë të shkurtër prej rreth tre muajsh, tre fëmijë kanë vdekur në klinikën e fëmijëve. Një foshnjë 14 muajshe ka ndërruar jetë nga bronkopneumonia, ndërsa prindërit kanë kërkuar me këmbëngulje ndihmë nga njëri spital në tjetrin dhe për këtë rast Komisioni kompetent ka konstatuar se mjekët në klinikën e fëmijëve dhe ata në Kozle kanë bërë pakujdesi gjatë vlerësimit të gjendjes së saj. Më herët kanë vdekur dy të porsalindur, një nga Strumica që ishte vetëm 8 ditësh, si dhe një foshnje katër muajshe nga Struga. /Alsat.mk
