Australia po përballet me shfaqjen e rregullt të varianteve të reja të virusit SARS-CoV-2 më shumë se pesë vjet pas shpalljes së pandemisë COVID-19.
Varianti më i fundit LP.8.1 është duke u përhapur, duke përbërë afërsisht një në pesë raste me COVID-19 në New South Wales, raporton SBS News të mërkurën.
Ai është bërë varianti i tretë më dominues në shtetin e New South Wales, përcjell agjencia turke AA. I zbuluar për herë të parë në korrik 2024, LP.8.1 është një pasardhës i Omikronit, konkretisht i KP.1.1.3, që është pasardhës i JN.1, një nën-variant që shkaktoi valë të mëdha infeksionesh me COVID në mbarë botën në fund të vitit 2023 dhe fillim të vitit 2024, transmeton KosovaPress.
Organizata Botërore e Shëndetësisë (OBSH) e ka shpallur LP.8.1 si një variant nën monitorim në janar, për shkak të rritjes së tij të ndjeshme në mbarë botën.
Agjencia globale e shëndetësisë ka vlerësuar që rreziku shtesë për shëndetin publik që paraqet LP.8.1 në nivel global është i ulët. Simptomat e LP.8.1 nuk duket të jenë më të rënda se ato të varianteve të tjera që qarkullojnë, duke sugjeruar se varianti nuk ka shumë mundësi të ndikojë në drejtimin e pandemisë.
Deri këtë vit, Australia ka regjistruar afërsisht 45.000 raste të reja me COVID-19, ndërsa rreth 260 persona janë aktualisht në spital me virusin. Numri real i rasteve është ndoshta shumë më i lartë, pasi shumë njerëz nuk po bëjnë më testime ose raportojnë infeksionet e tyre.
Vaksinat aktuale kundër COVID-19, përfshirë ato më të fundit të disponueshme JN.1, pritet të ofrojnë mbrojtje të mirë kundër sëmundjeve simptomatike dhe të rënda nga varianti LP.8.1.
