Në prag të fillimit të vitit të ri shkollor, Komuna e Gostivarit ka përfunduar një sërë punimesh rinovuese në disa shkolla fillore, në kuadër të përkushtimit të kryetarit Valbon Limani për përmirësimin e kushteve në arsim.
Gjatë pushimeve verore janë realizuar investime të rëndësishme në infrastrukturën shkollore. Në shkollën fillore të fshatit Çajlë janë ndërruar të gjitha dritaret dhe është shtruar dysheme e re. Në shkollën fillore “Bashkimi” në qytet janë realizuar punime të ngjashme, përfshirë ndërrimin e dritareve. Ndërkaq, në shkollën fillore “Bashkimi” në fshatin Llakavicë janë ndërruar dritaret dhe dyert, është vendosur fasadë e re, si dhe janë realizuar disa punime shtesë për përmirësimin e ambientit mësimor.
Përveç rinovimeve infrastrukturore, në dy shkolla – gjimnazin e mesëm dhe shkollën fillore “Goce Dellçev” – janë vendosur panele fotovoltaike, si pjesë e iniciativës për përdorimin e burimeve të ripërtëritshme të energjisë. Projekti do të zgjerohet edhe në shkolla të tjera në nivel lokal, me qëllim të uljes së shpenzimeve energjetike dhe reduktimit të ndotjes mjedisore.
Kryetari Limani ka theksuar se arsimi mbetet një ndër prioritetet kryesore të qeverisjes lokale dhe se investimet në këtë sektor do të vazhdojnë me intensitet edhe në të ardhmen.
