Edhe pse frika nga gjilpërat pengon akoma shumë fushata vaksinimi, shkenca po përgatit gjeneratën e re: një teknologji novatore, pa gjilpërë, po fiton terren. Thuhet se është më efektive, më komode dhe po aq e besueshme.Fill dentar, një vektor i ri për vaksinën.
Harroni injeksionet: studiuesit kanë testuar një metodë të bazuar në… fillin dentar! I veshur me vaksinë, ai aplikohet në mishrat e dhëmbëve, në “xhepin” e mishit, ku përshkueshmëria natyrale e indeve lejon që molekulat të arrijnë në mënyrë efektive te sistemi imunitar. Testet e kryera fillimisht te kafshët, e më pas te vullnetarë të rritur, tregojnë “shkallë të lartë përthithjeje të vaksinës dhe tolerancë të mirë”.
Cilat janë avantazhet krahasuar me metodat e tjera?
Përtej mungesës së gjilpërës, kjo mënyrë administrimi është qartësisht e ndryshme nga spraji nazal. Filli dentar vaksinë synon një zonë shumë specifike të gojës: epitelin nyjor, i cili është më i arritshëm dhe më i sigurt sesa mukoza nazale. Kjo ul rrezikun e kalimit të padëshiruar të substancave në tru, duke gjeneruar një përgjigje të fuqishme imunitare, veçanërisht në mushkëri dhe hundë.
Çfarë premton kjo metodë?
E lehtë për t’u përdorur dhe pa dhimbje, kjo risi nuk sjell ndonjë kosto shtesë të veçantë krahasuar me metodat ekzistuese, theksojnë studiuesit. Për personat me frikë nga gjilpërat ose për vaksinimin e fëmijëve, perspektiva e një vaksine orale mund të eliminojë shumë pengesa.
Megjithatë, edhe pse rezultatet janë shumë premtuese, metoda është ende në fazat e hershme të provave klinike: nevojiten studime në shkallë më të gjerë për të vërtetuar sigurinë dhe efektivitetin e saj te popullsia e përgjithshme. Sidoqoftë, dera mbetet e hapur për pajisje të reja mjekësore që mund të transformojnë përvojën tonë shëndetësore… dhe, pse jo, të eliminojnë gjilpërën nga peizazhi i vaksinimit. /The Body Optimist –
