Dy të reja, Darya 21 vjeçe dhe Karina 19 vjeçe, janë arrestuar nga autoritetet ruse pasi publikuan një video në rrjetet sociale, ku shfaqen duke pozuar përballë një depoje karburanti që ishte përfshirë nga flakët në qytetin Adler, Soçi. Zjarr i madh shpërtheu në depon e karburanti në qytetin bregdetar të Soçit, në Rusinë jugore, pas një sulmi me dron nga forcat ukrainase. Autoritetet ruse njoftuan se mbetjet e dronit të rrëzuar goditën cisternat e karburantit, duke shkaktuar flakët që përfshinë zonën.
Në video, që u bë virale, vajzat shfaqen duke pozuar me zjarri në sfond dhe me muzikë që dëgjohet në prapaskenë. Reagimi i policisë ishte i menjëhershëm, duke çuar në arrestimin e të ashtuquajturës “influencere”.
Ministria e Brendshme e Soçit kishte njoftuar më herët se ishte në kërkim të të rinave, të cilat i cilësoi si “zoomers të pamatura”, dhe paralajmëroi se veprimet e tyre do të vlerësohen ligjërisht dhe do të ndëshkohen sipas ligjit.
Ndërkohë, sipas raportimeve zyrtare, dronë vetëvrasës me rreze të gjatë veprimi të ushtrisë ukrainase kanë goditur sërish depozitat e karburantit në zonën bregdetare të Soçit, që prej orëve të para të mëngjesit të sotëm.
Gjatë 48 orëve të fundit, janë regjistruar disa sulme të drejtpërdrejta ndaj rafinerive të naftës dhe depozitave të karburantit në pjesë të ndryshme të Rusisë, duke shkaktuar dëmtime në rrjetin lokal të furnizimit dhe duke rritur pasigurinë për stabilitetin energjetik, veçanërisht në rajonet jugore të vendit.
