Armenia dhe Azerbajxhani mund të jenë afër nënshkrimit të një marrëveshjeje historike të paqes ose të paktën shpalljes së saj kur udhëheqësit e të dyja vendeve të jenë të ftuarit e presidentit amerikan, Donald Trump, në Shtëpinë e Bardhë më 8 gusht.
Kryeministri armen, Nikol Pashinian, pritet të udhëtojë drejt Uashingtonit dhe presidenti azerbajxhanas, Ilham Aliyev, po ashtu pritet të jetë atje për bisedime të mundshme. Megjithatë, ende nuk është e qartë se në çfarë formati do të jenë takimet në Uashington.
Asnjë nga tre kryeqendrat nuk ka publikuar informacione përfundimtare. Megjithatë, raportimet e mediave, që citojnë burime diplomatike, sugjerojnë se Trumpi mund t’i presë Pashinianin dhe Aliyevin veçmas, para një takimi trepalësh më 8 gusht. Palët mund të mos nënshkruajnë asnjë marrëveshje, por vetëm të njoftojnë për synimin që të arrijnë një marrëveshje në një të ardhme të afërt.
“Nuk ka zëra për nënshkrimin e ndonjë dokumenti. Rezultati i negociatave do të përcaktojë se çfarë lloj dokumenti, nëse do të ketë fare, do të miratohet”, tha Hasmik Hakobyan, anëtare e partisë në pushtet në Armeni, Kontrata Civile, e cila njëherësh është anëtare e Komisionit parlamentar për Marrëdhënie të Jashtme.
