Donald Trump e ka quajtur Volodymyr Zelenskyn “diktator” në një postim të ashpër në “Truth Social”.
Presidenti amerikan tha se homologu i tij ukrainas kishte bërë një “punë të tmerrshme” dhe se “më mirë të lëvizë shpejt ose nuk do t’i mbetet shtet”.
“Unë e dua Ukrainën, por Zelensky ka bërë një punë të tmerrshme, vendi i tij është shkatërruar dhe MILIONA kanë vdekur pa qenë nevoja – Dhe kështu vazhdon…”, ka postuar ai, raporton “SkyNews”.
Ai tha se Zelensky, të cilin ai e quajti një “komedian modest i suksesshëm”, e kishte nxitur Amerikën të shpenzonte 350 miliardë dollarë për të “shkuar në një luftë që nuk mund të fitohej”.
“Ai refuzon të ketë zgjedhje, është shumë poshtë në sondazhet në Ukrainë dhe e vetmja gjë në të cilën ishte i zoti ishte të luante Bidenin ‘si një violinë’”, shtoi ai.
“Një diktator pa zgjedhje, Zelensky më mirë të lëvizë shpejt ose do të mbetet pa shtet”.
Trumpi tha se në ndërkohë ShBA-ja “po negocionte me sukses një fund të luftës me Rusinë”, diçka që “të gjithë e pranojnë” se vetëm administrata e tij mund ta arrijë.
