Presidenti amerikan Donald Trump kërkon që me një dekret të ri të ashpërsojë rregullat për zgjedhjet në SHBA.
Sipas dekretit kushdo që dëshiron të regjistrohet për zgjedhjet federale duhet që në të ardhmen të dëshmojë përmes dokumente shtetësinë amerikane. Po ashtu edhe votat e dërguara me postë duhet të arrijnë tek autoritetet deri ditën e zgjedhjeve. SHBA-ja ka dështuar në “zbatimin e masave bazë dhe të nevojshme për zgjedhjet”, thuhet në urdhrin ekzekutiv të Trump.
Shteteve federale u kërkohet të bashkëpunojnë me autoritetet federale për të shkëmbyer listat e votuesve dhe për të ndjekur penalisht krimet zgjedhore.
Presidenti i SHBA-së nuk mund t’i detyrojë drejtpërdrejt shtetet federale të ndryshojnë ligjet zgjedhore. Për të zbatuar planet e tij, Trump planifikon të ushtrojë presion financiar: fonde të caktuara federale do të dërgohen vetëm në shtetet që pajtohen me dekretin dhe e zbatojnë atë.
Pas nënshkrimit të projektligjit Trumpi njoftoi se javët e ardhshme do të ndërmarrë hapa të mëtejshëm sa i përket ligjit elektoral në SHBA. Dekreti i Trumpit pritet të kundërshtohet në gjykatë nga organizatat që merren me ligjin elektoral. Ata argumentojnë se rreth nëntë për qind e qytetarëve amerikanë të moshës për të votuar, pra rreth 21.3 milionë vetë, nuk kanë dëshmi për shtetësinë e tyre.
Po ashtu edhe gratë e martuara që kanë ndryshuar mbiemrat e tyre, mund të kenë probleme me regjistrimin, sepse në certifikatat e tyre të lindjes kanë mbiemrin e vajzërisë. Kjo u bë e dukshme së fundmi në zgjedhjet në New Hampshire.
Trumpi ka kritikuar vazhdimisht se zgjedhjet manipulohen, veçanërisht pas humbjes së tij ndaj Joe Biden në vitin 2020. Trump ka qenë veçanërisht kritik ndaj votimit me postë, duke pretenduar pa prova se ai është i pasigurt dhe hap rrugën për mashtrime.
