Presidenti Donald Trump nënshkroi një dokument që i heq ish-zëvendëspresidentes Kamala Harris mbrojtjen e zgjeruar nga Shërbimi Sekret, një vendim që përmbys një urdhër të paraardhësit të tij Joe Biden. Ky urdhër, i datës 28 gusht dhe titulluar “Memorandum për Sekretarin e Sigurisë Kombëtare”, njofton ndërprerjen e të gjitha masave të sigurisë përtej asaj që kërkohet ligjërisht, duke hyrë në fuqi më 1 shtator 2025.
Sipas ligjit federal, ish-presidentët marrin mbrojtje për jetë, ndërsa ish-nënpresidentët kanë të drejtë për gjashtë muaj mbrojtje pas përfundimit të mandatit të tyre. Për Harris, kjo periudhë kishte skaduar në korrik 2024, por Biden kishte nënshkruar një urdhër që e zgjaste mbrojtjen për një vit tjetër. Ky është pikërisht urdhri që Trump e ka revokuar.
Vendimi vjen pak para se Harris të nisë një turne mbarëkombëtar për promovimin e librit të saj të ri, “107 Ditë”, që do të dalë në shitje më 23 shtator. Turneu konsiderohet angazhimi i saj më i madh publik që nga largimi nga detyra, pasi ka pasur pak paraqitje publike në të kaluarën.
Ndihmësja e Harris, Kirsten Allen, deklaroi se ish-zëvendëspresidentja është mirënjohëse ndaj Shërbimit Sekret për profesionalizmin dhe përkushtimin ndaj sigurisë. Megjithatë, ekspertët e sigurisë paralajmërojnë se humbja e mbrojtjes zyrtare nuk prek vetëm shoqërimin 24-orësh, por edhe aksesin në analizën e kërcënimeve, monitorimin e komunikimeve elektronike dhe vlerësimin e rrezikut në rrjetet sociale. Vlerësohet se një mbrojtje private me nivel të ngjashëm mund të kushtojë miliona dollarë në vit.
