Ish-presidenti amerikan Donald Trump i ka thënë kryeministrit izraelit Benjamin Netanyahu se nëse ai fiton zgjedhjet në SHBA, Izraelit do t’i duhet t’i japë fund luftës në Gaza deri në momentin që ai të kthehet në detyrë.
Dy burime të njohura me këtë çështje e zbuluan këtë për Times of Israel.
Sipas një ish-zyrtari të administratës Trump dhe një zyrtari izraelit, mesazhi u përcoll për herë të parë kur kandidati republikan presidencial priti kryeministrin izraelit në resortin e tij në Florida, Mar-a-Lago, në korrik.
Ndërsa Trump ka konfirmuar publikisht se i tha Netanyahut se ai dëshiron që Izraeli ta fitojë luftën shpejt, burimet që folën për Times of Israel janë të parët që zbuluan se kërkesës i ishte bashkangjitur një afat kohor.
Ish-zyrtari amerikan theksoi se Trump nuk ishte specifik në apelin e tij drejtuar Netanyahut dhe mund të mbështeste fare mirë aktivitetin “të mbetur” të IDF në Gaza, për sa kohë që Izraeli zyrtarisht i jep fund luftës.
