Transportuesit privat sërish kanosen me bllokime të reja nga e hëna. U kanosën se nëse nuk ka zgjidhje për borxhin, sërish do të dalin në rrugët e qytetit të Shkupit. Ata nuk heqin dorë nga takimi me kryetaren e Shkupit, Danella Arsovska dhe me kryeministrin Dimitar Kovaçevski. Po që se kjo nuk do të ndodhë këtyre ditëve, zgjedhja e vetme për këta janë protestat. Këta shpresojnë se kryeministri Kovaçevski, do të jetë ndërmjetësues për zgjidhjen e këtij problemi.
“Ne shpresojmë në ndihmë dhe t’i bëjnë thirrje qytetit. Të jenë ndërmjetësues, të ulemi të bisedojmë se si të zgjidhet problemi me transportin publik. Po që se nuk na ftojnë deri të premten, ne kemi takim me koordinatorët e linjave dhe do merremi vesh se si do veprojmë nga e hëna. Po që se nuk na ftojnë patjetër do të duhet të hyjmë në grevë. Kjo është zgjidhja e vetme demokratike, e drejta në grevë dhe këtë do ta shfrytëzojmë.”, – thanë punonjësit e transportuesit privat.
Transportuesit privat këtë javë para selisë së NQP “Shkup”, kërkuan takim me drejtorin për të gjetur zgjidhje për problemin me borxhin, por u refuzuan me arsyetimin se ai është në mbledhje. Para vitit të ri, në shenjë të vullnetit të mirë, vendosën t’i tërheqin autobusët nga rrugët e Shkupit. Kryeqendra tani dy muaj është pa transport të kompletuar urban, prej kur qyteti i Shkupit, shfuqizoi kontratat me transportuesit “Slloboda prevoz” dhe “Makespres”.
