Hansi Flick u shkarkua nga detyra e trajnerit të Gjermanisë të dielën, njoftoi Federata e Futbollit të vendit (DFB), një ditë pasi humbja 4-1 ndaj Japonisë thelloi errësirën rreth skuadrës përpara organizimit të Kampionatit Evropian të vitit të ardhshëm.
DFB tha se drejtori Rudi Völler do të jetë një nga tre trajnerët që do të marrin përgjegjësinë e përbashkët për ndeshjen e ardhshme, një miqësore kundër Francës të martën në Dortmund.
Në humbjen e turpshme 4-1 të së shtunës ndaj Japonisë, sulmi i Gjermanisë dukej pa dhëmbë dhe mbrojtja e saj dukej e paaftë për t’u marrë me sulmuesit dhe mesfushorët japonezë.
Rudi Völler pritet të ulet në stol kundër Francës dhe Julian Nagelsmann mund të jetë trajneri i ardhshëm.
Tekniku 58-vjeçar numëron 25 ndeshje në krye të Kombëtares së “Panzerave”, ku ka marrë mesatarisht 1.72 pikë për ndeshje.
Në 6 ndeshjet e fundit, një nga Përfaqësueset më të mëdha në botë ka marrë vetëm një fitore, një barazim, ndërsa është mundur 4 herë. Pika që mbushi kupën ishte disfata e mbrëmshme ndaj Japonisë në miqësore, me shifrat 1-4.
Tashmë Gjermania synon që shumë shpejt të gjejë trajnerin e ri, për të nisur menjëherë nga puna.
