Gazetari, Naser Selmani, në kolumnën e tij të botuar në gazetën Lajm ka shkruar mbi aktualitetin e fundit dhe zhvillimet politike që ndërlidhen kryesisht me tragjedinë e Koçanit. Ai mes tjerash ka theksuar që ish ministrin Kreshnik Bekteshin e ka arrestuar Islam Abazi, dhe është viktim e shokëve të tij që nuk qëndruan të përballen me drejtësinë, prandaj edhe është në paraburgim që edhe ky i fundit mos të arratiset.
Por, fokusi kryesor i kësaj kolumne është në atë që gjitha tragjeditë që kanë ndodhur në vend, janë të ndërlidhura me BDI-në. Kjo tregon jetëgjatësinë e BDI-së në pushtet dhe rehatinë nga mos dhënia e llogarisë.
“VLEN të tregojë vendosmëri të palëkundur dhe të qëndrojë fuqishëm pranë shumicës së
shqiptarëve, të cilët janë të etur për drejtësi – qoftë për rastet tragjike, si zjarri në spitalin
modular në Tetovë, rastin “Durmo Turs” në Laskarcë, rastin “Besa Trans” dhe shumë të tjera. Ende e kemi të freskët rastin e spitalit modular në Tetovë, kur 14 shqiptarë u dogjën të gjallë për shkak të fajit të pushtetit. Ishte pikërisht BDI-ja, e cila duke i keqpërdorur institucionet e sistemit, e ngulfati protestën e shqiptarëve që kërkonin vetëm DREJTËSI. Sikur të kishte drejtësi atëherë, ndoshta tragjeditë e tjera do të ishin parandaluar”, ka shkruar Naser Selmani.
Ai gjithashtu shton se pjesëmarrja e gjatë e BDI-së në pushtet ka dëshmuar se ata nuk brengosen për asgjë tjetër pos klanit të tyre. Ndërkaq, përfshirjen e tyre në korrupsion Selmani thotë se e ka vulosur edhe lista e zezë amerikane.
“Nga pjesëmarrja në qeverisje për 22 vite, BDI e ka dëshmuar se nuk shqetësohet për askënd tjetër përveçse për sektën e tyre politike. Ata nuk druajnë nga drejtësia selektive, sepse ata ishin kreatorët e kësaj drejtësie. Ata shqetësohen vetëm për veprat e tyre që i kanë lënë pas. E sa për veprat e tyre, për to dëshmon edhe SHBA-ja, e cila të zgjedhurin e Ali Ahmetit, Artan Grubi, e vendosi në listën e zezë për shkak të dyshimeve se është i përfshirë në korrupsion të lartë”, shkruan Selmani.
