Nga muaji maj deri në fund të korrikut të këtij viti, në të gjithë territorin e Maqedonisë së Veriut janë regjistruar mbi 2,000 aksidente trafiku. Sipas të dhënave zyrtare, gjatë kësaj periudhe tragjike kanë humbur jetën 22 persona.
Shkaku kryesor i aksidenteve vazhdon të mbetet shpejtësia e tejkaluar. Statistikat e Ministrisë së Punëve të Brendshme tregojnë se numri më i madh i aksidenteve – plot 780 – ka ndodhur gjatë muajit korrik, ndërsa më i ulëti në maj.
Në këto ngjarje nuk janë përfshirë vetëm shtetas të RMV-së, por edhe të huaj. Vetëm në muajt maj dhe qershor, 95 shtetas të huaj kanë qenë të përfshirë në aksidente trafiku në vend. Fatmirësisht, asnjë prej tyre nuk ka humbur jetën.
Ministri i Brendshëm, Pançe Toshkovski, ka bërë të ditur se me ndryshimet e reja në Ligjin për Sigurinë në Rrugë, Ligjin për Kundërvajtjet dhe Kodin Penal, do të ashpërsohen masat ndaj drejtuesve të papërgjegjshëm. Automjetet do të konfiskohen përgjithmonë për ata që kapen duke drejtuar pa patentë, nën ndikimin e alkoolit apo drogave, si dhe për ata që ecin me shpejtësi ekstreme.
Për krahasim, statistikat evropiane tregojnë një kontrast të fortë: gjatë vitit të kaluar, Finlanda ishte i vetmi vend i Bashkimit Evropian ku nuk është shënuar asnjë aksident rrugor me pasoja fatale.
