“Reagim i vonuar” ishte motoja e marshit protestues që në Koçan u organizua nga familjarët e viktimave në diskotekën “Pulse”. Në orën 12 e 05, marshi filloi nga Parku i Revolucionit ku pjesëmarrësit shprehën pakënaqësinë e tyre për reagimin e vonuar të institucioneve, që sipas tyre janë një nga shkaktarët e tragjedisë së madhe në Koçan.
Në heshtje dhe pikëllim, kolona e gjatë me familjarë të viktimave dhe qytetarë të tjerë kaloi nëpër Qendrën Tregtare të qytetit, duke u ndalur për pak kohë para kafenesë, pronari i të cilës posedonte edhe diskotekën “Pulse”. Prej këtu, turma u drejtua drejt objektit të Komunës së Koçanit, ku ndodhen edhe objektet e Inspektoratit Shtetëror të Tregut.
Me një minutë heshtje, pjesëmarrësit në marshin protestues para Stacionit Policor shprehën pakënaqësinë e tyre për mosveprim për parandalimin e fatkeqësisë dhe më pas kërkuan informacione për procedurën hetimore të deritanishme nga Gjykata Themelore dhe nga Prokuroria Themelore Publike.
“Kërkojmë llogari për atë që keni bërë”, ka qenë i vetmi mesazh me zë të lartë që kanë brohoritur protestuesit para Prokurorisë, i cili shkruhej edhe në një nga pankartat që mbanin në duar.
Ndër të tjera në pankarta shkruhej “Engjëjt tanë meritojnë drejtësi”, “Ndal drejtësisë selektive”, “Ky nuk është një aksident, kjo është vrasje” dhe të ngjashme. Më pas, protestuesit u kthyen në pikën e tyre të nisjes, në Park dhe njoftuan se protesta të tilla do të vazhdojnë deri në ndëshkimin e autorëve të ngjarjes tragjike./Alsat.mk
