Kryeministri Hristijan Mickoski dënon thirrjet nacionaliste dhe ksenofobe të disa personave që janë dëgjuar gjatë ndeshjes së basketbollit mes Maqedonisë dhe Rumanisë, të zhvilluar në Kumanovë. Shton se gjatë kohës kur zhvillohej loja, nuk i kishte vërrejtur këto thirrje, por megjithatë shprehu qëndrim të qartë kundër çdo forme të nacionalizmit dhe urrejtjes etnike.
“Për të qenë i sinqertë, përderisa isha aty, as që i vura re këto brohoritje, sepse bëhej fjalë për një grup të vogël. Por, shfrytëzoj rastin që të përfshihem në dënimin e nacionalizmit dhe ksenofobisë, së pari ndaj asaj që ndodhi në ndeshjen e basketbollit mes Maqedonisë dhe Rumanisë dhe t’u bëj thirrje të gjitha grupeve tifoze që të përkrahin ekipin e tyre në mënyrë sportive. E tërë kjo do të jetë lëndë hetimore dhe sanksionuese, pa marrë parasysh se nga cila anë vjen”, u shpreh kryeministri Hristijan Mickoski.
