Një tender i fundit i Ministrisë së Punëve të Brendshme (MPB) për furnizimin me uniforma të reja për policinë ka nxitur debate të ashpra politike, duke e rikthyer në vëmendje çështjen e zbatimit të Ligjit për përdorimin e gjuhëve, në veçanti përdorimin e shqipes në institucionet shtetërore.
Siç thuhet sipas specifikimeve të tenderit, në pjesën e pasme të xhaketave policore është parashikuar që të figuroj vetëm shkrimi policia në alfabetin cirilik. Kjo ka ngjallur reagimin e Bashkimit Demokratik për Integrim (BDI), e cila e cilëson vendimin si shkelje flagrante të Ligjit për gjuhët dhe të Marrëveshjes së Ohrit, duke akuzuar Qeverinë për qasje diskriminuese ndaj gjuhës shqipe.
Qeveria: Çështja do të rregullohet me tender të veçantë
Në përgjigje ndaj reagimeve, zëvendëskryeministri i parë Izet Mexhiti deklaroi se çështja e mbishkrimeve në dy gjuhë në uniformat dhe emblemat policore do të zgjidhet përmes një tenderi të ri dhe të posaçëm, në përputhje me ligjin.
“Bazuar në Ligjin për përdorimin e gjuhëve, uniformat dhe bexhat e policisë në komunat me shumicë shqiptare do të jenë në maqedonisht dhe shqip, ashtu siç është rregulluar edhe për shërbimet e zjarrfikësve dhe të shëndetësisë,”
tha Mexhiti.
Ligji për përdorimin e gjuhëve, i miratuar në vitin 2018, parashikon që në komunat ku së paku 20% e qytetarëve flasin një gjuhë tjetër zyrtare, përfshirë Shkupin, institucionet publike janë të detyruara të përdorin dy gjuhë në komunikimin zyrtar dhe simbolet publike, përfshirë uniformat dhe emblemat e policisë, zjarrfikësve dhe personelit mjekësor.
MPB: Po veprojmë sipas ligjit dhe rregulloreve ekzistuese
Nga ana tjetër, ministri i Punëve të Brendshme, Pançe Toshkovski, deklaroi se procedura e prokurimit është zhvilluar në përputhje të plotë me ligjin dhe me rregulloret e miratuara në vitin 2018, duke nënvizuar se këto rregullore janë hartuar në kohën kur në qeveri ishin BDI dhe LSDM.
“BDI kishte mundësinë të implementonte plotësisht këtë ligj në të kaluarën. Ne po veprojmë konform rregulloreve që janë miratuar pikërisht në atë periudhë,”
theksoi Toshkovski.
Ai shtoi se uniformat aktuale janë të vjetruara dhe jopraktike, ndaj është hapur tenderi për uniforma të reja moderne, të dizajnuara sipas standardeve të policive evropiane.
BDI: Kjo është një tjetër qasje diskriminuese
BDI thekson se ky nuk është një rast i izoluar, por pjesë e një qasjeje sistematike diskriminuese nga VMRO-DPMNE, duke rikujtuar se kjo parti ka iniciuar procedurën në Gjykatën Kushtetuese për shqyrtimin e kushtetutshmërisë së Ligjit për përdorimin e gjuhëve.
Debati zhvillohet në një klimë të tensionuar politike, në prag të fushatës zgjedhore për zgjedhjet lokale, ku çështjet gjuhësore dhe identitare janë sërish në qendër të vëmendjes publike dhe politike
