Kombëtarja e Shqipërisë mbylli përgatitjet për ndeshjen vendimtare kundër Serbisë në kualifikueset e “Botërorit 2026”. Nën drejtimin e Sylvinjo dhe stafit teknik, skuadra kuqezi zhvilloi seancën e fundit stërvitore në Tiranë.
Të gjithë futbollistët ishin të pranishëm, ndërsa për fat të mirë, pas problemeve që shoqëruan ditët e para të grumbullimit, anjë prej lojtarëve nuk ka shfaqur probleme fizike.
Në këtë mënyrë, trajneri i dha dorën e fundit përgatitjeve, ndërsa me grupin e plotë ka kristalizuar idetë e tij mbi formën e futbollistëve si dhe formacionin që do të zbresë në fushë nga minuta e parë të shtunën kundër Serbisë në stadiumin e Leskovacit.
Edhe një herë, program stërvitor u përqëndrua te perfeksionimi i skemave taknike, me situata të ndryshme loje si në mbrojtje ashtu edhe në sulm.
Kombëtarja e Shqipërisë do të udhëtojë drejt Leskovacit paraditen e së premtes, ndërsa ka në program edhe një seancë stërvitore, më shumë ambjentuese me terrenin në stadimin e ndeshjes.
Po ashtu, në orët e para të pasdites, trajneri Silvinjo do të dalë përpara mediave për konferencën zyrtare në vigjilje të sfidës. / abcnews.al
