Qeveria spanjolle miratoi një projektligj të ri kundër pirjes së duhanit në vend, i cili vjen në mes të një përpjekjeje për të kufizuar aksesin e të rinjve në duhan dhe për të përmirësuar shëndetin publik.
Ligji do të zgjeronte hapësirat pa duhan në Spanjë, do t’i jepte fund shitjes së cigareve elektronike njëpërdorimshe dhe do të ndalonte reklamat e duhanit.
Ai gjithashtu do të ndalonte shprehimisht dyqanet që t’u shesin produkte duhani të miturve – dhe do t’u vinte gjobë prindërve nëse fëmijët kapen duke pirë duhan.
Bëhet e ditur se pirja e duhanit dhe cigareve elektronike do të ndalohen rishtazi në automjete, pishina, kampuse universitare, stacione transporti publik dhe tarraca restorantesh dhe baresh, ndër të tjera vende të jashtme.
Sipas ligjit të propozuar, produkte të tilla si cigaret elektronike, qeset e nikotinës dhe produktet bimore do të trajtoheshin në të njëjtën mënyrë si cigaret tradicionale.
Qeveria spanjolle tha se reformat synojnë të përshtatin rregulloret e vendit për duhanin me format e reja të konsumit, të përforcojnë mbrojtjen e shëndetit publik dhe të zvogëlojnë ekspozimin e njerëzve ndaj duhanit, veçanërisht për të rinjtë.
Rreth një e katërta e njerëzve të moshës 15 vjeç e lart në Spanjë pinë duhan, sipas të dhënave të Bashkimit Evropian.
