Sot bëhen 17 vjet nga vdekja e ish-presidentit të Serbisë dhe Republikës Federale të Jugosllavisë (RFJ), Sllobodan Millosheviq. Ai vdiq më 11 mars 2006 në njësinë e paraburgimit të Tribunalit të Hagës, ku gjykohej për krime dhe krimet kundër njerëzimit në Kroaci, Kosovë dhe për gjenocid në Bosnje dhe Hercegovinë.
Millosheviqi u zgjodh president i Serbisë në zgjedhjet e para shumëpartiake pas rënies së komunizmit në dhjetor të vitit 1990 dhe mbajti këtë pozitë për 2 mandate.
Ai ishte kryetar i Partisë Socialiste të Serbisë (SPS), e cila u krijua nga Unioni i Komunistëve të Serbisë dhe Unioni Socialist i Popullit Punëtor të Serbisë, shkruan N1, përcjell Klankosova.tv.
Në korrik të vitit 1997, ai u zgjodh kryetar i RFJ-së dhe qëndroi në atë pozitë deri në zgjedhjet e shtatorit 2000, në të cilat fitoi kandidati i Opozitës Demokratike të Serbisë (DOS), Vojislav Koshtunica.
Millosheviqi fillimisht refuzoi të njohë rezultatet e zgjedhjeve presidenciale, të cilat çuan në protesta masive civile që kulmuan më 5 tetor, kur qindra mijëra protestues u mblodhën në Beograd.
Qeveria e re e arrestoi Millosheviqin më 1 prill të vitit 2001 në Beograd, për keqpërdorim të dyshuar të pozitës zyrtare dhe në bazë të Dekretit të Qeverisë së Serbisë, kurse ish-presidenti u ekstradua në Tribunalin e Hagës më 28 qershor me akuzën për krime lufte në territorin e ish-Jugosllavisë.
Gjyqi i Millosheviqit nuk përfundoi me një vendim gjyqësor, pasi ish-presidenti i Serbisë dhe RFJ-së vdiq në njësinë e paraburgimit të Tribunalit si pasojë e një ataku kardiak.
Trupi i Sllobodan Millosheviqit u soll në Serbi në mars të vitit 2006 dhe ish-presidenti u varros në oborrin e shtëpisë së familjes në Pozharevc.
Në funeralin e Millosheviqit morën pjesë zyrtarët më të lartë të Partisë Socialiste të Serbisë, me përjashtim të presidentit aktual Ivica Daçiq, si dhe nënkryetari i atëhershëm i Partisë Radikale Serbe Tomislav Nikolić, presidentit të Partisë Komuniste Ruse Genadi Zyuganov, Deputeti i Dumës Sergej Baburin dhe gjeneralit Leonid Ivashov, si dhe ish-prokurorit të përgjithshëm amerikan Ramsey Clark.
