UEFA Champions League rikthehet me emocionet dhe spektaklin e dueleve çerekfinale. Kontinenti njeh sonte dy ekipet e para që do të kalojnë në gjysmëfinale. Barcelona është në kushte shumë komode në sajë të fitores 4 me 0 në takimin e parë.
Katalanasit bënë një superndeshje në shtëpinë e tyre, udhëhequr nga një super Lamin Jamal. Blaugranat, në fakt, janë duke jetuar një moment të artë, pasi edhe në kampionatin spanjoll janë duke dominuar. Suksesi i thellë i skuadrës së Flik në takimin e parë ia bën të vështirë, ose më mirë të themi të pamundur, kualifikimin skuadrës së Dortmundit. E vetmja gjë që mund të bëjë ekipi verdhezi është të respektojë tifozët e vet duke i dëfryer përmes një loje dhe rezultati pozitiv.
Më e hapur është ndeshja në çiftin tjetër Aston Villa–Paris Saint-Germain. Francezët fituan takimin e parë 3 me 1 në shtëpi duke dominuar, dhe kjo duket sikur i jep një marzh të lartë mundësie për të shkuar në gjysmëfinale. Mirëpo, anglezët e kanë treguar se janë ekip fushe dhe do të provojnë të bëjnë mrekullinë sonte në shtëpi kundër një ekipi me shumë talente. Të dyja takimet luhen në orën 21:00 .
