Futbolli turk po përballet me një krizë të madhe pas zbulimit tronditës nga Federata Turke e Futbollit (TFF), e cila ka njoftuar se 371 gjyqtarë të ligave profesionale janë lidhur me bastet sportive, duke ngritur shqetësime serioze për korrupsion dhe konflikt interesi.
Hetimi i brendshëm i federatës ka zbuluar se nga 571 gjyqtarë aktivë, plot 371 kanë pasur llogari bastesh, ndërsa 42 prej tyre kanë vendosur mbi 1 mijë baste secili. Shumica e basteve janë bërë në ndeshje ndërkombëtare, por shkalla e përfshirjes ka shkaktuar alarm në gjithë komunitetin e futbollit turk.
Presidenti i TFF-së, Ibrahim Haciosmanoglu, paralajmëroi masa të menjëhershme disiplinore: “E dimë që futbolli turk ka nevojë për ndryshim. Kemi filluar nga gjyqtarët dhe komisioni ynë disiplinor do të marrë hapat e nevojshëm dhe do të vendosë sanksionet e duhura”.
Ai shtoi se hetimet mund të zgjerohen edhe në poste të tjera kyçe në futboll, për të rikthyer ndershmërinë në këtë sport.
Skandali ka shkaktuar reagime të forta nga klubet më të mëdha të vendit.
Presidenti i Galatasarayt, Dursun Aydin Ozbek, e quajti situatën një “goditje serioze ndaj etikës sportive dhe vlerave themelore të futbollit turk” dhe shprehu mbështetjen për çdo masë korrigjuese.
Nga ana tjetër, Trabzonspor e përshkroi procesin si “një hap historik drejt rikthimit të drejtësisë”, ndërsa Fenerbahçe kërkoi transparencë të plotë mbi emrat e gjyqtarëve të përfshirë dhe ndeshjet e prekura.
Ky zbulim ka vënë futbollin turk nën një lupë ndërkombëtare, duke nxjerrë në pah nevojën urgjente për reforma të thella dhe mbikëqyrje më të rreptë, me qëllim mbrojtjen e integritetit të lojës.
