Qeveria e Edi Ramës ka bërë një skandal në konferencën rajonale të nivelit të lartë që u mbajt javën e kaluar në Tiranë, pjesë e së cilës ishte edhe Kosova. Por, Kosova nuk u trajtua si shtetet tjera. Kosova ishte prezantuar me fusnotë duke iu referuar ‘Rezultues 1244 e OKB-së’, një formulim që e bëri zv/ministrin në detyrë të Financave, Agron Doburuna, ta lëshoj konferencën si shenjë revolte, shkruan Gazeta Insajderi.
Zëvendësministri në detyrë i Financave, Agron Doburuna, përmes një postimi në facebook ka njoftuar se është larguar nga konferenca, për shkak të mënyrës së papranueshme të përfaqësimit të Republikës së Kosovës në atë ngjarje.
Në këtë konferencë i pranishëm ishte edhe kryeministri i Shqipërisë, Edi Rama.
Doburuna, i cili ishte i ftuar të përfaqësonte Republikën e Kosovës, deklaroi se ishte i detyruar të largohej nga konferenca dhe të mos e nënshkruante Deklaratën e Angazhimit.
“Mënyra si u trajtua përfaqësimi i Kosovës ishte thellësisht zhgënjyese dhe e papranueshme për një shtet sovran, që kontribuon në mënyrë aktive dhe të barabartë në këto procese,” ka shkruar Doburuna.
Doburuna ka shkruar se kërkesa për ta korrigjuar këtë paraqitje u injorua nga Ministria e Shëndetësisë dhe Mbrojtjes Sociale të Shqipërisë, duke cenuar frymën e bashkëpunimit dhe respektit të ndërsjellë që promovon vetë konferenca.
Kosova është një realitet i pamohueshëm ndërkombëtar. Ne jemi të përkushtuar thellësisht për të garantuar të drejtat e fëmijëve tanë dhe për të kontribuar në paqe e stabilitet në rajon, por kjo nuk mund të bëhet duke na mohuar subjektivitetin shtetëror,” ka thënë Dobruna.
