Sektori për Punë të Brendshme – Manastir ka dorëzuar kallëzim penal në Prokurorinë Themelore Publike të Manastirit kundër gjashtë të punësuarve në Ndërmarrjen Publike “Pyjet Nacionale”, për shkak të dyshimit për vepra penale “neglizhencë në detyrë” dhe “keqpërdorim të pozitës dhe autorizimeve zyrtare”, me ç’rast buxhetit të ndërmarrjes i është shkaktuar dëm prej mbi 170 mijë eurove, njofton TV21.
Sipas MPB-së, punonjësit, mes tyre ish-drejtues dhe roje pylli në degën “Bigla” në Demir Hisar, gjatë viteve 2023 dhe 2024 nuk kanë kryer kontrollin e nevojshëm në disa njësi pyjore, duke lejuar prerje ilegale të drurit dhe mungesa të mëdha në evidencë. Vetëm tek njësia pyjore “Ilinska Planina” është konstatuar mungesë prej 954 metra kub drurë, ndërsa në total është evidentuar prerje e pa raportuar prej 1.504 metra kub, duke shkaktuar dëme mbi 10.5 milionë denarë.
Dy të punësuar të tjerë akuzohen për keqpërdorime gjatë procesit të prerjes dhe transportit të druve të zjarrit, ku është konstatuar mungesë e qindra metrave kub material drusor. Rasti është dorëzuar për procedim të mëtejshëm në Prokurorinë Themelore Publike në Manastir.
