Në Siri u fal namazi i parë i Fitër Bajramit pas rënies së regjimit të Bashar Asadit, raporton Anadolu.
Qytetarët në të gjitha qytetet e vendit u mblodhën që në orët e para të mëngjesit dhe përjetuan gëzimin e festës së Bajramit.
Qytetarët që morën pjesë në faljen e Bajramit të parë pas rënies së regjimit të Asadit qëndruan në rreshta dhe falën namazin nën shoqërimin e tekbireve.
Në hutben (ligjëratën) e lexuar pas namazit, dolën në pah mesazhet e bashkimit dhe solidaritetit dhe u theksua se populli sirian duhet të bashkohet dhe të bëjë një fillim të ri pas kohëve të vështira që ka kaluar.
Gjithashtu u kryen lutje edhe për rindërtimin e vendit dhe vendosjen e paqes.
Omar Shahrur, i cili fali namazin e Bajramit në xhaminë Emevite tha për AA se janë të lumtur që festojnë Bajramin e parë pa regjimin e Asadit në Siri.
“Ne shpëtuam nga regjimi mizor që varfëroi, poshtëroi, vrau dhe zhvendosi popullin tonë. Sot ne po e festojmë Bajramin lirisht së bashku me të gjithë botën islame”, tha Shahrur.
Duke vënë theksin mbi unitetin dhe bashkimin, Shahrur tha se “Kjo fitore u arrit falë luftës së heronjve tanë dhe mbështetjes së madhe të vendeve vëllazërore ato arabe dhe Türkiyes. Dashtë Zoti, Siria nuk do të kthehet më kurrë në sundimin e shtypjes dhe tiranisë”.
– “Po shijojmë lirinë”
Haviye Attar, e cila jeton në Arabinë Saudite tha se së shpejti do të kthehet në Siri. “Tani po shijojmë lirinë. Tani jam e lirë në çdo mënyrë dhe kjo më jep lumturi të papërshkrueshme. Gjatë kohës së Asadit kishte frikë dhe shtypje. Sundimi i tij bënte njerëzit të ndienin neveri. Allahu e mallkoftë. Por, tani falë Zotit ne mund t’i shprehim lirshëm ndjenjat tona”, tha ajo.
Attar tha se tani mund të kryejë lirisht adhurimin e saj. “Tani mund të falemi dhe të vizitojmë xhaminë Emevite. Kjo nuk ishte e mundur në të kaluarën. Faleminderit Zotit”, u shpreh ajo.
– “Shpresojmë se do ta rindërtojmë vendin së shpejti”
Ragad Shamiye tha se ka ardhur nga Britania e Madhe me shoqen e saj për të kaluar festën në vendin e saj dhe për të festuar rënien e regjimit. “Regjimi i Asadit e bëri vendin të pabanueshëm për 60 vjet. Por, tashmë jemi të lirë. Dashtë Zoti, ne do ta rindërtojmë vendin tonë në një kohë të shkurtër”, tha Shamiye.
