Sindikatat mbajtën një seancë publike në mes të rrugës, me tre pika në rendin e ditës. “Nuk mund për deputetët të ketë para, ndërsa për punëtorët jo”. Pika e dytë “dora e shtrirë nga punëtori sot – mund të bëhet një grusht i shtrënguar nesër”, dhe pika e tretë iu drejtua Qeverisë se “nuk mund të vendosë për punëtorët pa punëtorët”.
“E vë rendin e ditës në votim, kush është “PËR”, faleminderit për miratimin e rendit të ditës”, tha Slobodan Trendafilov.
Para Kuvendit, ku vazhdoi marshimi, sindikalistët votuan për një vendim për uljen e pagave luksoze të deputetëve sa minimalja, derisa të rriten edhe pagat e punëtorëve.
“Sindikatat kanë vendosur njëzëri të ulin pagat tuaja luksoze të deputeteve në pagën minimale, derisa të rrisni pagat e punëtorëve. Për fund, kam një pyetje personale, a është Brane në punë apo jo?”, pyet Slobodan Trendafilov – Kryetar i LSM-së.
Marshimi vazhdoi në Odën Ekonomike, ku punëdhënësve iu kërkua të rrisin pagat minimale, në mënyrë që ata të mos jenë fajtorët më të mëdhenj për emigrimin e të rinjve dhe punëtorëve nga Maqedonia.
“Nga unë, të nderuar punëdhënës, ju keni një mesazh UUAAA, rritni pagat, sepse ne nuk kemi një shtet rezervë, do të largoheni ju nga Maqedonia, e jo ne, për sa kohë që ju jeni të kënaqur me këto në qeveri dhe pagën 400 euro”, deklaroi Ivan Peshevski – Nënkryetar i LSM-së.
“Çdo vit, 10.000 punëtorë dhe të rinj emigrojnë nga vendi ynë”, tha Igor Gjerasov – Kryetar i Sindikatës së Degëve.
Protestuesit i thanë qeverisë se nëse paga minimale nuk rritet në 500 euro, ata do të hyjnë në grevë të përgjithshme në të gjithë vendin.
“Qeveria e parë në historinë e Maqedonisë që vendosi për një pagë minimale pa pjesëmarrjen e sindikatave, qeveria e parë në historinë e Maqedonisë që vendosi që 129,000 punonjës në sektorin publik duhet të varen nga një pagë minimale….as nuk kemi frikë nga ju, dhe ju presim të na thirrni, nëse jo, ne do të vijmë vetë”, u shpreh Tërpe Deanoski – Kryeatar i SPOGJ-it.
Qeveria i bëri thirrje sindikatës të mos abuzojë me situatën në vend dhe e akuzoi protestën se kishte prapavijë partiake. Në njoftimin për media, ata deklarojnë se ishin kundër rritjes së pagave të funksionarëve, por sindikata ishte e heshtur në atë kohë, siç ishte e heshtur gjatë gjithë kohës që LSDM ishte në pushtet. “Nuk është problem për ne që të ulim pagat, por nuk do ta zgjidhë problemin e punëtorëve,” thanë nga qeveria, duke shtuar se “problemi i punëtorëve mund të zgjidhet në mënyrë sistematike dhe me qasjen e duhur. Neve na vjen keq për situatën e vështirë dhe problemet e popullit tonë, dhe nuk do të na largojnë nga ai mision, sindikalistët e vetëquajtur të motivuar nga partia, të cilët shtyjnë axhendën partiake të partive LSDM dhe BDI”, thuhet në deklaratën e qeverisë. /Alsat.mk
