Në një reagim të drejtpërdrejtë ndaj debatit aktual për pagën minimale, Sindikata e Pavarur e Gazetarëve dhe Punonjësve Mediatikë (SPGM) i ka bërë thirrje Qeverisë dhe punëdhënësve për rritje të menjëhershme të saj. Sipas SSNM, ruajtja e dinjitetit të gazetarëve dhe punonjësve të mediave është kyçe për mbrojtjen e lirisë së medias dhe interesit publik.
Sindikata thekson se paga minimale aktuale nuk siguron një jetë të denjë dhe është larg realitetit jetësor të punonjësve mediatikë. Në anketën e fundit të realizuar në janar 2024, më shumë se 50% e të punësuarve në media kishin të ardhura nën mesataren, ndërsa një pjesë e madhe janë të varur nga paga minimale e përcaktuar me ligj.
“Tre të katërtat e të punësuarve në media aktualisht marrin më pak se paga mesatare, dhe numri i atyre që punojnë për pagë minimale është në rritje,” thekson SPGM, duke kërkuar rritje sa më të shpejtë të saj.
Sindikata thekson gjithashtu se statusi social i gazetarëve ndikon drejtpërdrejt në motivimin, profesionalizmin dhe përkushtimin e tyre, që janë elemente themelore për shërbimin e interesit publik. Situata është edhe më alarmante në mediat lokale, ku punonjësit shpeshherë mbajnë deri në tre pozita pune, zakonisht me pagë minimale.
“Presim nga Qeveria dhe punëdhënësit një zgjidhje që pasqyron realisht nevojat e anëtarësisë sonë dhe që do të ishte në përputhje me standardet e vendeve të rajonit,” thuhet në deklaratë.
SPGM përfundon se paga të denja për gazetarët nënkuptojnë gazetari profesionale, të pavarur nga qendrat e pushtetit dhe mbrojtëse të lirisë së shprehjes dhe interesit publik.(INA)
