Shkollat filluan me zbatimin e udhëzimeve të reja në rast kërcënimi me bombë. Në këtë kontekst parashihet forcimi i patrullave policore nëpër shkolla, ndalimi i hyrjes në oborr për të huajt, kontrollet antiterroriste pa prishur procesin arsimor. Ministri Spasovski zbuloi detaje të reja, thotë se kërcënimet me bombë vijnë nga adresa në Rusi dhe Iran, ndërsa këto shërbime janë paguar me kriptovaluta, gjë që e vështirëson gjetjen e autorëve. Po ashtu janë izoluar edhe disa raste të kërcënuesve nga territori i RMV-së, potencon Spasovski.
“Në procedurën hetuese kemi të izoluara disa njohuri për njerëz që këtë e kanë bërë edhe nga territori i RMV-së. Ky hetim është në fazë të avancuar dhe kur të jetë momenti i duhur do ta informojmë opinionin. Me rëndësi është që me masat e reja kemi situatën tërësisht nën kontroll të mos rrezikohet siguria e nxënësve dhe kuadrit arsimor.”, – deklaroi ministri i punëve të brendshme, Oliver Spasovski.
Shkollat, çerdhet respektojnë udhëzimet e reja në rast kërcënimi
“Janë dërguar shkresa në të gjitha kopshtet se si të veprohet dhe si të mbrohen nga çdo kërcënim. Kjo është bërë së bashku me Ministrinë e Punëve të Brendshme dhe Ministrinë e Punës dhe Punës Sociale në sferën e çerdheve, si të mbrohen dhe në rast se ka raportime, se si të largohen fëmijët në mënyrë të sigurt nga objektet.”, – theksoi ministrja e punës dhe politikës sociale, Jovana Trençevska.
Në pesë muajt e fundit janë evidentuar 500 kërcënime të rreme për vendosje të bombave. MPB deri më tani ka zbuluar vetëm tre raste. Shkollat javën që lamë pas, vijuan mësimin online, për shkak të kërcënimeve të shumta që vinin në e-mail adresat e tyre.
