Pilotët dhe ekuipazhi në linjat ajrore evropiane po përballen me presione të shtuara për të punuar orë të gjata dhe për të fshehur lodhjen, duke vënë në rrezik sigurinë e fluturimeve, sipas “The Financial Times”.
Një studim i Universitetit të Ghent në Belgjikë, që përfshiu 6 900 punonjës, zbulon se politikat e kursimit dhe ndjekjes së fitimeve kanë “dobësuar sistematikisht” sigurinë në industrinë ajrore.
Sipas raportit, pandemia e Covid-19 përshpejtoi përkeqësimin e kushteve të punës. Një brez pilotësh me përvojë u largua nga sektori dhe u zëvendësua me punonjës më të rinj, më të lirë dhe me kontrata të pasigurta, që ulin aftësinë për të mbrojtur standardet e sigurisë. Më shumë se gjysma e të anketuarve thanë se nuk ndihen të lirë të kundërshtojnë vendime të menaxhmentit kur kanë shqetësime për sigurinë.
Ekuipazhet e kabinës raportuan gjithashtu se ndihen të detyruar të shesin produkte si parfume apo alkool gjatë fluturimit, duke krijuar konflikt mes detyrimeve tregtare dhe rolit të tyre për të mbajtur pasagjerët të sigurt. Studiuesit paralajmërojnë se ky kalim “nga siguria te shitjet” po dëmton mirëqenien, integritetin profesional dhe standardet në fluturim.
Rritja e presionit nga kompanitë me kosto të ulët dhe rikthimi i trafikut ajror pas pandemisë ka sjellë orare më të gjata dhe më pak pushim për punonjësit. 42% e tyre thanë se menaxhmenti vendos orarin mbi sigurinë, ndërsa shumë pilotë e ekuipazh ndihen të frikësuar të deklarohen “të papërshtatshëm për fluturim” edhe kur janë të sëmurë apo të rraskapitur.
Studimi zbuloi gjithashtu se 68% e punonjësve kanë probleme me shëndetin mendor dhe 78% ndihen “të dehumanizuar”. Punësimet afatshkurtra ose përmes agjencive janë veçanërisht problematike, me punonjësit në Evropën Lindore që raportojnë kushtet më të vështira dhe pasiguri më të madhe.
