Heqja dorë nga telefoni inteligjent edhe për vetëm tri ditë riformëson aktivitetin e trurit, tregon studimi i botuar në revistën Computers in Human Behavior dhe i kryer mbi 25 vullnetarë me koordinimin e Mike M. Schmitgen, nga Universiteti gjerman Heidelber.
Rezultatet tregojnë gjithashtu se mungesa e telefonit stimulon receptorët e varësive, si duhanpirja dhe alkooli.
Për të kuptuar rreziqet e përdorimit të tepërt dhe ndikimin e tyre në trurin tonë, studiuesit u kërkuan 25 vullnetarëve të moshës 18-30 vjeç që të kufizojnë përdorimin e telefonave të zgjuar sa më shumë që të jetë e mundur dhe t’i nënshtrohen testeve dhe ekzaminimeve instrumentale para dhe pas këtij pushimi.
Analizat e aktivitetit të trurit me imazhe funksionale të rezonancës magnetike nxorën në pah disa ndryshime që ndodhën në ato pak orë dhe “u gjetën lidhje midis ndryshimeve në aktivizimin e trurit me kalimin e kohës dhe sistemeve neuro-transmetuese të lidhura me varësinë”, vërejnë autorët e hulumtimit.
Në teste të tjera, pas 72 orësh larg nga telefoni inteligjent, vullnetarëve iu shfaqën më pas imazhe me subjekte të ndryshme, si lule apo varka, dhe të tjera me telefona inteligjentë dhe në këto raste u vu re aktivizimi i disa pjesëve të trurit që lidhen me përpunimin e shpërblimeve, të ngjashme me sinjalet e trurit që lidhen me varësinë ndaj substancave si nikotina apo alkooli, raporton ANSA.
