Në Çarshinë e Vjetër të Shkupit u ndanë 15 karroca elektrike nga ana e Shoqatës së personave me nevoja të veçanta “Sos Vita”. Bëhet fjalë për donacion nga njerëzit human. Kryetari i Shoqatës, Ertan Shaqiri, tha se pesë vite e gjysmë, prej kur ekziston “Sos Vita” janë ndarë 170 karroca elektrike për personat me nevoja të veçanta.
“Sot 15 karroca elektrike do të shpërndahen. I falënderoj të gjithë ata të cilët kanë kontribuar, që dhanë mundin që sot ta marrin nga një Mercedes personat me nevoja të veçanta, zoti ju shpërbleftë!”, – deklaroi kryetari i shoqatës “Sos Vita”, Ertan Shakiri.
Të pranishmit theksuan që në të ardhmen do të kontribuojnë më shumë për personat me nevoja të veçanta.
“Ne na ka nderuar me prezencën e tij në Çarshinë tonë dhe është një kënaqësi ku ne së bashku duhet të jemi përkrahës të mëdhenj për personat me nevoja të posaçme. Ne si Çarshi, mundohemi që t’u bëjmë hapësirë për të qarkulluar lehtë në Çarshinë tonë.”, – theksoi kryetari i esnafit të Çarshisë, Bujar Dullovi.
“Le të jetë ky event një mesazh për të gjithë të pranishmit këtu se personat që kanë nevoja të veçanta fizike jo gjithmonë janë grupi i cili duhet të margjinalizohet, por në fakt ne mund t’i drejtohemi këtij grupi dhe të përfitojmë nga ata shumë.”, – u shpreh deputet, Bekim Sali.
“Ne deputetet do të bëjmë organizime, projekte të ndryshme për përkrahjen e personave edhe atë varësisht prej shkollimit për punësime.”, – theksoi deputetja, Merita Koxhaxhiku.
Nga shoqata “Sos Vita” shprehën mirënjohje edhe për përfaqësuesit e ambasadës së Turqisë për kontributin e dhënë për personat me aftësi të kufizuara.
