Shkëndija e nisi me fitore sezonin e ri, duke shënuar një triumf të thellë në derbin ndaj Shkupit me rezultat 5–1, në kuadër të xhiros së parë të Ligës së Parë të Maqedonisë së Veriut. Ndeshja, e zhvilluar në Tetovë, nisi me ritëm të lartë, ku Florent Ramadani realizoi golin e parë në minutën e 8-të. Shkupi barazoi shpejt në minutën e 14-të, por vetëm pak minuta më vonë, në të 17-ën, ekipi mysafir mbeti me një lojtar më pak pas një kartoni të kuq. Përparësinë numerike Shkëndija e shfrytëzoi menjëherë, duke kaluar sërish në epërsi me golin e Arbin Zejnulait në minutën e 21-të, rezultat me të cilin u mbyll pjesa e parë (2–1).
Në pjesën e dytë, kuqezinjtë dominuan plotësisht, duke shënuar edhe tri gola të tjerë në minutat 70’, 76’ dhe 83’, duke vulosur kështu një fitore të madhe 5–1 dhe nisur sezonin në mënyrën më të mirë të mundshme.
Kjo fitore i jep Shkëndijës tri pikët e para dhe një sinjal të qartë se synon kreun e tabelës që nga fillimi i kampionatit.
