Papa Françesku është tërhequr nga takimet e së premtes pas disa problemeve shëndetësore, tha një zëdhënës i Vatikanit.
Matteo Bruni u tha gazetarëve se udhëheqësi katolik nuk ndihej mirë. Megjithatë, ai nuk ka dhënë detaje të tjera. Herën e fundit që pati probleme shëndetësore konkretisht ethe të rënda, në mars, papa 86-vjeçar u dërgua me urgjencë në spital ku u diagnostikua me bronkit akut. Ai mori antibiotikë intravenoz dhe u lirua tre ditë më vonë.
Papa argjentinas ka vuajtur nga një sërë problemesh shëndetësore vitet e fundit.
Në prill, ai kaloi disa ditë në spital pasi vuante nga një infeksion respirator.
Një zyrtar i Vatikanit, duke folur në kushte anonimiteti sepse nuk ishte i autorizuar të fliste për shëndetin e Papës, tha se Françesku nuk priti askënd në audiencë të premten “për shkak të një gjendjeje të ethshme”.
Nuk kishte audiencë zyrtare të planifikuar për të premten, por Françesku mban një axhendë të veçantë, private dhe jozyrtare takimesh me njerëzit që pret në rezidencën e tij.
Françesku ka pasur një javë të ngjeshur, duke kryesuar një takim të konferencës së peshkopëve italianë, duke marrë pjesë në një takim pasdite të enjten me fondacionin e shkollës së tij Scholas Occurentes, si dhe duke u takuar me disa prelatë të tjerë dhe personalitete të tjera vizitore.
Ai do të kryesojë meshën e Rrëshajëve të dielën në bazilikën e Shën Pjetrit dhe në shenjë se pritej të shërohej shpejt, Vatikani të premten njoftoi një audiencë të re zyrtare me presidentin italian Sergio Mattarella, të planifikuar për të hënën.
