Shtetet e Bashkuara kanë njoftuar Rusinë se do të ndërpresin shkëmbimin e disa të dhënave për forcat e saj bërthamore pas refuzimit të Moskës për ta bërë një gjë të tillë, tha Shtëpia e Bardhë të martën, duke e quajtur vendimin një përgjigje ndaj pezullimit të pjesëmarrjes së Rusisë në traktatin e ri të armëve bërthamore, START.
Shtetet e Bashkuara dhe Rusia kanë së bashku gati 90% të kokave bërthamore në botë – të mjaftueshme për të shkatërruar planetin shumë herë.
“Sipas ligjit ndërkombëtar, Shtetet e Bashkuara kanë të drejtë t’u përgjigjen shkeljeve të Rusisë të Traktatit të Ri START duke marrë masa proporcionale në mënyrë që ta shtyjnë Rusinë të rikthehet tek detyrimet e saj,” tha një zëdhënës i Këshillit të Sigurisë Kombëtare.
“Kjo do të thotë se meqenëse pezullimi i pretenduar i Rusisë i Traktatit të Ri START është ligjërisht i pavlefshëm, SHBA-ja ka të drejtën ligjërisht të ndalë përditësimin tonë të të dhënave dy herë në vit në përgjigje të shkeljeve të Rusisë,” shtoi zëdhënësi.
“Rusia nuk ka qenë në përputhje të plotë dhe ka refuzuar të ndajë të dhënat që kishim rënë dakord në bazë të traktatit të ri START t’i ndanim dy herë në vit,” u tha gazetarëve në një konferencë telefonike, John Kirby, Koordinatori i Këshillit të Sigurisë Kombëtare për Komunikimet Strategjike.
“Meqenëse ata kanë refuzuar të zbatojnë kushtet, edhe ne kemi vendosur të mos ndajmë ato të dhëna,” shtoi ai. “Ne do të preferonim ta bënim një gjë të tillë, por kjo kërkon që edhe ata të jenë të gatshëm të bëjnë të njëjtën gjë.”
Traktati i ri START i nënshkruar në vitin 2010 dhe që do të skadojë në vitin 2026, kufizon numrin e mbushjeve strategjike bërthamore që mund të dislokojnë vendet. Sipas kushteve të tij, Moska dhe Uashingtoni mund të vendosin jo më shumë se 1550 mbushje bërthamore strategjike dhe 700 raketa dhe bombardues me bazë tokësore dhe nëndetëse për mbartjen e tyre.
Sipas “Shkëmbimeve dyvjeçare të të dhënave” të traktatit, secili vend jep një deklaratë për mjetet strategjike, lëshuesve dhe mbushjeve luftarake, përfshirë këmbimin e informacionit për numrin e mbushjeve të dislokuara në tre llojet e mjeteve të shpërndarjes – nga ajri, deti dhe toka. Secili nga vendet detajon gjithashtu se sa automjete strategjike transporti dhe sa mbushje luftarake janë dislokuar në secilën bazë.
Një zëdhënës i Departamentit të Shtetit tha se “përveç shkëmbimit të të dhënave dy herë në vit, Shtetet e Bashkuara vazhdojnë të ofrojnë të gjitha njoftimet e parashikuara nga Traktati i Ri START.” /VOA
