Bisedimet mes Iranit dhe Shteteve të Bashkuara për të ardhmen e programit bërthamor iranian kanë nisur në Muskat, kryeqyteti i Omanit, në një përpjekje të re për të ringjallur negociatat pas tërheqjes së SHBA-së nga marrëveshja bërthamore e vitit 2015.
Ministri i Jashtëm iranian, Abbas Araghchi, deklaroi për televizionin shtetëror se Irani është i përgatitur të arrijë një “marrëveshje të drejtë dhe të ndershme”, duke shtuar se vendi i tij hyn në bisedime nga një “pozicion i barabartë”. Ai theksoi se nëse pala tjetër mban të njëjtin qëndrim, ekziston shpresa për një mirëkuptim fillestar.
Delegacioni amerikan drejtohet nga i dërguari i Presidentit Donald Trump, Steve Witkoff, i cili është shprehur i hapur vetëm për bisedime ballë për ballë, ndonëse aktualisht palët po zhvillojnë diskutime të ndara dhe të ndërmjetësuara nga zyrtarë të Omanit.
Araghchi theksoi se delegacioni iranian përbëhet nga ekspertë me përvojë të gjerë në fushën e energjisë bërthamore dhe të diplomacisë ndërkombëtare.
Bisedimet vijnë në një moment kritik, pasi marrëveshja bërthamore e vitit 2015, nga e cila SHBA u tërhoq në vitin 2018 gjatë presidencës së Trump, është afër skadimit. Që prej tërheqjes së SHBA-së, Irani ka rritur aktivitetin bërthamor dhe ka grumbulluar uranium të pasuruar përtej kufijve të lejuar, si reagim ndaj sanksioneve të rënda ekonomike amerikane.
Presidenti Trump, nga ana tjetër, ka paralajmëruar se nëse nuk arrihet një marrëveshje e re që parandalon Iranin nga ndërtimi i armëve bërthamore, Shtetet e Bashkuara nuk do të hezitojnë të ndërmarrin masa ushtarake. Ai e cilësoi takimin e Muskatit si “shumë të rëndësishëm”, duke shtuar se dështimi i bisedimeve “do të ishte një ditë shumë e keqe për Iranin”.
Irani këmbëngul se qëllimi i tij është zhvillimi i energjisë bërthamore për qëllime paqësore dhe se nuk ka synuar kurrë të ndërtojë armë bërthamore. Sidoqoftë, qëndrimi amerikan mbetet i prerë: “Irani nuk do të ketë armë bërthamore”, tha Presidenti Trump gjatë një takimi me kryeministrin izraelit Benjamin Netanyahu në Shtëpinë e Bardhë.
Bisedimet në Oman pritet të shërbejnë si hap i parë për të përcaktuar një kuadër negociues dhe për të krijuar bazat për një marrëveshje të mundshme në të ardhmen.
